ओलिम्प टु । युरोपा लिग फुटबलको राउन्ड अफ सिक्सटिनमा इङलिश क्लव म्यानचेष्टर युनाइटेडले बराबरीमै चित्त बुझाएको छ । रुसी क्लव एफसी रुस्तोभसंगको खेलमा म्यानचेष्टरले १–१ गोलको बराबरीमा खेल सकाएको हो ।
३५ औं मिनेटमा हेन्रिक एमखित्रायनको गोलबाट म्यानचेष्टरले अग्रता लिए पनि ५३ औं मिनेटमा एलेक्सान्द्र बुखारोभले गोल गर्दै घरेलु क्लवलाई बराबरीमा ल्याए ।
यो खेलमा बराबरी गरे पनि अब दोस्रो लेगको खेल घरेलु मैदान ओल्ड ट्राफोर्डमा खेल्ने भएकाले म्यानचेष्टरले क्वार्टरफाइनलमा ठाउँ बनाउने विश्वास म्यानचेष्टरका प्रशिक्षक जोजे मौरिन्होको छ ।
उनी मैदानप्रति भने असन्तुष्ट देखिएका छन् ।
युरोपा लिगका बिहीबार रातिका अन्य खेलमा एन्डरलेच, एफसी कोबेनहेभन, सेल्टाभिगो, जेन्क र लियों विजयी भएका छन् । एन्डरलेचले एपोइल निकोसियालाई १–० ले, कोबेनहेभेनले आयाक्सलाई २–१ ले, सेल्टाभिगोले एफसी क्रास्नोडारलाई २–१ ले, जेन्कले जेन्टलाई ५–२ ले, लियोंले रोमालाई ४–२ ले हरायो ।
ओलम्पियाकोस र बेसिक्तास तथा साल्के र बोरुसिया मोन्चेनग्लाबाचले १–१ को बराबरी खेले ।
