स्पेनिश लिगमा रियाल मड्रिड नै अगाडि, इस्कोले गरे उद्धार, मेस्सी चम्के
प्रकाशित २०७४ वैशाख ३ आइतबार
524
Shares
क्याम्प नोउ । स्पेनिश फुटबल लिग ला लिगामा रियाल मड्रिड र बार्सिलोना विजयी भएका छन् । रियाल मड्रिडले स्पोर्टिङ गियोनलाई ३–२ ले हरायो ।
रियाललाई स्पोर्टिङको मैदानमा विजयी गराउन इस्कोले दुई गोल गरे । त्यसैगरी अल्भारो मोराटाले एक गोल गरे ।
इस्कोले इन्जुरी समयमा गोल नगरेको भए रियाल मड्रिड बराबरीमै थन्किने थियो । प्रशिक्षक जिनेदिन जिदानले क्रिष्टियानो रोनाल्डोलाई आराम दिएको परिणाम घातक हुने देखिएको थियो ।
अर्को खेलमा डिफेन्डिङ च्याम्पियन बार्सिलोनाले रियाल सोसिडाडलाई ३–२ ले हरायो । बार्सिलोनालाई विजयी गराउन लिओनल मेस्सीले लगातार दुई गोल गरे ।
तर सोसिडाडले पनि गोल थप्दै जाँदा बार्सिलोनालाई सकस भएको थियो । मेसीले १७ औं र ३७ मिनेटमा गोल गरे ।
४२ औं मिनेटमा साउइल उम्तितिले आत्मघाती गोल गरेर सोसिडाडलाई अन्तर कम गरे । ४४ औं मिनेटमा अल्कासरले गोल गर्दै ३–१ को स्थितिमा ल्याए ।
तर एक मिनेटमै प्रेटोले गोल गरेर अन्तरलाई ३–२ बनाए । अन्तिम समयसम्म बार्सिलोना बराबरी हुने डरले तनावमै रहन पुग्यो ।
मध्यान्तरपछि लुइस सुवारेज र जेरार्ड पिकेले पहेंलो कार्ड खाए ।
यो खेलपछि पनि रियाल मड्रिडको अग्रता कायमै छ । रियालको ३१ खेलबाट ७५ अंक छ ।
एक खेल बढी खेलेको बार्सिलोनाको ७२ अंक छ । रियाल मड्रिड अझै पनि बलियो स्थितिमै छ ।
