रियाल मड्रिड च्याम्पियन्स लिगको नकआउट चरणमा, रोनाल्डोको सयौं युरोपियन गोल
प्रकाशित २०७४ मंसिर ६ बुधबार
372
Shares
काठमाडौं । स्पेनिस फुटबल क्लव रियाल मड्रिड युरोपियन च्याम्पियन्स लिग फुटबलको नकआउट चरणमा प्रवेश गरेको छ ।
मंगलबार राति भएको खेलमा साइप्रसको अपोईल निकोसियामाथि आधा दर्जन गोल बर्साउँदै रियाल प्रिक्वाटरफाइनलमा पुगेको हो ।
रियाललाई जिताउन क्रिष्टियानो रोनाल्डो र करिम बेन्जेमाले २–२ तथा लुका मोड्रिक र नाचो फर्नान्डेजले १–१ गोल गरे ।
रोनाल्डोको यो सयौं युरोपियन गोल हो ।
लिगको समुह एच बाट यसअघि नै नकआउट चरणमा पुगेको टोटनह्याम हट्सपरले मंगलबार राती बोरुसिया डर्टमण्डलाई २–१ ले हरायो ।
समुह इ को खेलमा लिभरपुल र सेभिल्लाले ३–३ को तथा स्पार्टाक मस्को र मारिबोरले १–१ गोल गरे ।
समुह एफ को खेलमा म्यान्चेस्टर सिटी र नापोली विजयी भए । यसअघि नै नक आउट चरणमा प्रवेश गरिसकेको इङ्लिस क्लव म्यान्चेस्टर सिटीले फेयनुर्डलाई १–० ले हराउँदा नापोलीले शख्तर दोनेस्कलाई ३–० ले पराजित गयो ।
समुह जी को खेलमा एफसी पोर्टोसँग १–१ गोलको बराबरी खेल्दै बेसिक्तास पनि अर्को चरणमा उक्लिएको छ । अर्को खेलमा आरबी लेप्जिगले मोनाकोलाई ४–१ ले हरायो ।
