काठमाडौं । इंगलिस प्रिमियर क्लव म्यान्चेस्टर युनाइटेड लिग कप फुटबलको क्वाटरफाइनलबाटै बाहिरिएको छ । बुधबार राति भएको खेलमा म्यान्चेस्टर युनाइटेड च्याम्पियनसिप क्लब ब्रिस्टोल सिटीसँग पराजित भएको हो ।
ब्रिस्टोल सिटी २–१ को जित निकाल्न सफल भएको हो ।
५१ औं मिनेटमा जोय ब्रायले गोल गर्दै ब्रिष्टोललाई अग्रता लिए । तर त्यसको सात मिनेटपछि ज्लाटन इब्राहिमोविचले म्यान्चेस्टर युनाइटेडलाई गोल दिलाए र बराबरी गरे ।
खेल १–१ को बराबरीमै थियो तर इन्जुरी समयको तेस्रो मिनेटमा कोरी स्मिथले गोल गर्दै ब्रिष्टोल सिटीलाई जित दिलाए ।
प्रिमियर लिगको दोस्रो स्थानमा रहेको म्यान्चेस्टर युनाइटेडको हारले जोजे मौरिन्होलाई सबैभन्दा ठूलो चोट परेको छ ।
अब ब्रिष्टोलले सेमिफाइनलमा म्यान्चेस्टर सिटीसंग खेल्नेछ ।
अर्को सेमिफाइनलमा चेल्सी र आर्सनल भिड्ने छन् ।
आर्सनलले मंगलबार राति वेष्टह्याम युनाइटेडलाई १–० ले हराएको थियो भने चेल्सीले बुधबार राति बर्नमाउथलाई २–१ ले हरायो ।
चेल्सीलाई विजयी गराउन विलियम र अल्भारो मोराटाले गोल गरे । बर्नमाउथलाई अन्तिममा डान गोस्लिङले गोल दिलाए ।
