काठमाडौं । स्पेनिस लिग ला लिगा फुटबलमा डिफेन्डिङ च्याम्पियन रियाल मड्रिडले जित्न बिर्सिएपछि यसपटकको लिग उपाधि दावेदारीबाट हात धुने पक्का भएको छ ।
रियालले आइतबार राति सेल्टाभिगोसंग २–२ को बराबरी खेल्यो । ग्यारेथ बेलले दुवै गोल गरेर टिमलाई अग्रता दिलाए पनि त्यसलाई निरन्तरता राख्न नसक्नु नै रियालका लागि दुर्भाग्य बन्यो ।
सेल्टाका इयागोले एउटा पेनाल्टी प्रहारलाई मिस गरेका थिए ।
वास र गोमेजले १–१ गोल गरे ।
यो बराबरीले स्तव्ध रियालका प्रशिक्षक जिनेदिन जिदान पोष्ट म्याच कन्फरेन्समा समेत गएनन् ।
उनी खेलाडीहरुसंग ड्रेसिङ रुममै बसेका थिए । उनले पछि स्पेनिस टेलिभिजनलाई प्रतिक्रिया दिँदै हामी रिसाएका छौं, खुसी छैनौं, हामी जित्न चाहथ्यौं भने । उनले विपक्षीले दोस्रो हाफमा राम्रो खेलेकैले हामीले जित्न सकेनौं भने ।
यो बराबरीले लिगमा रियाल बार्सिलोनाभन्दा १६ अंकले पछि परेको छ । बार्सिलोनाको ४८ तथा रियाल मड्रिडको ३२ अंक छ । रियाल चौथो स्थानमा छ ।
