काठमाडौं । ब्राजिल रुसमा जारी विश्वकप फुटबलको क्वार्टरफाइनलमा प्रवेश गरेको छ। सोमबार राति भएको प्रिक्वार्टरफाइनलमा प्रतिद्धन्द्धी मेक्सिकोमाथि २–० को सहज नतिजा निकाल्दै ब्राजिलले क्वार्टरफाइनलमा ठाउँ बनाएको हो ।
निरन्तर पूर्व विजेताहरु बाहिरिने क्रम जारी रहँदा पाँच पटकको च्याम्पियन ब्राजिलले संयमित खेल खेल्दै उपाधिका लागि प्रमुख दावेदारी दिएको हो ।
ब्राजिललाई जिताउन नेयमार नै नायक भएर प्रस्तुत भए ।
खेलको ५१ औं मिनेटमा नेयमारले सुन्दर गोल गरेका थिए । त्यसपछि ८८ औं मिनेटमा नेयमारले गोलका लागि रोबर्टो फर्मिनोलाई सुन्दर पास दिए ।
खेलमा ५४ प्रतिशत बल आफ्नो कब्जामा लिए पनि मेक्सिकोले गोल गर्न सकेन । गोलका लागि मेक्सिकोले गरेका दुई प्रयास खेर गए ।
ब्राजिलले भने १० प्रयास गरेको थियो । मेक्सिकोका चार खेलाडीले पहेंलो कार्ड खाँदा ब्राजिलका फिलिप्पे लुइस र क्यासेमिरोले पहेंलो कार्ड खाए ।
