काठमाडौं । इंगलिश प्रिमियर लिग फुटबलमा सरप्राइज प्रदर्शन गर्दै आइरहेको वाट्फोर्डको नटआउट यात्रा सकिएको छ । लगातार चार खेल जितेर सनसनी मच्याएको वाट्फोर्ड पाँचौं खेलमा भने खराव लयबाट गुज्रिएको म्यान्चेस्टर युनाइटेडबाट पराजित भयो ।
घरेलु मैदानमा वाट्फोर्ड २–१ ले पराजित भयो । म्यान्चेस्टर युनाइटेडका म्यानेजर होजे मौरिन्होको जागिर संकटमा भएका बेलामा वाट्फोर्डमाथि जित हात पारेको हो ।
रोमेलु लुकाकु र क्रिस स्मालिङले १–१ गोल गरे । वाट्फोर्डका आन्द्रे ग्रेले गोल फर्काए ।
यो खेलपछि वाट्फोर्ड १२ अंकसहित चौथो स्थानमा झरेको छ । ९ अंकबा म्यान्चेस्टर युनाइटेड आठौं स्थानमा छ ।
यता लिभरपुल दोस्रो स्थानमा झरेको छ । सत्प्रतिशत नतिजालाई कायमै राखे पनि चार खेलसम्म गोल अन्तरमा शीर्ष स्थानमा रहेको लिभरपुललाई चेल्सीले उछिनेको हो ।
शनिबारको खेलमा लिभरपुलले टोटनह्यामलाई २–१ ले हरायो । त्यस्तै डिफेन्डिङ च्याम्पियन म्यान्चेस्टर सिटीले फुल्हमलाई ३–० ले हरायो । सिटी १३ अंकसहित तेस्रो स्थानमा छ । सिटी अहिलेसम्मको अपराजित टिम हो ।
लरोए साने, डेभिड सिल्भा र रहिम स्टर्लिङले गोल गरे ।
