काठमाडौं । च्याम्पियन्स लिग फुटबलमा बार्सिलोनाले कप्तान लियोनल मेस्सीको गोलबाट जित निकालेको छ । स्पेनिश क्लव बार्सिलोनाले बुधबार रातिको खेलमा इंगलिश क्लव टोटनह्याम हट्सपरमाथि ४–२ को जित निकालेको हो ।
समूह बी अन्तर्गतको खेलमा लगातार दोस्रो जित निकालेको बार्सिलोनालाई जिताउन मेस्सीले दुई गोल गरे । बार्सिलोनाका लागि दोस्रो मिनेटमा नै फिलिप्पे कौटिन्होले गोल गर्दै सुरुवाती अग्रता दिलाए । २८ औँ मिनेटमा इभाँ राकिटिकले गोल गरेपछि पहिलो हाफमा बार्सिलोनाले २–० को अग्रता लियो ।
दोस्रो हाफमा टोटनह्यामले खेलमा फर्किने संकेत गर्यो । ५२ औँ मिनेटमा ह्यारी केनले गोल फर्काए । तर त्यसको चार मिनेटपछि बार्सिलोनाका कप्तान मेस्सीले गोल गरे ।
६६ औँ मिनेटमा एरिक लामेलाले टोटनह्यामका लागि गोल गरेपछि खेलमा बार्सिलोनाको अग्रता ३–२ को अवस्थामा पुग्यो । तर ९० औँ मिनेटमा मेस्सीले व्यक्तिगत दोस्रो गोल गरेपछि बार्सिलोनाले ४–२ को जित पक्का गरेको हो ।
यसअघि बार्सिलोनाले पिएसबी आइन्डहोभनलाई हराएको थियो । ह्यारि केनले टोटनह्यामको मैदानमा जादू देखाउने अनुमान फेल खायो । टोटनह्याम फ्यानले मेस्सीको पनि राम्रो समर्थन गरे ।
समूह बी अन्तर्गत नै भएको खेलमा इटालियन क्लब इन्टर मिलानले आइन्डहोभनलाई २–१ ले हरायो । बार्सिलोना र इन्टर मिलान समान ६ अंकसहित समूहको पहिलो र दोस्रो स्थानमा छन् ।
