उद्योग वाणिज्य संघका अध्यक्षको निधनको शोकमा बयलवास बजार बन्द

प्रकाशित मिति : २०७५ पौष २७ शुक्रबार

सर्लाही। उद्योग वाणिज्य संघ ईश्वरपुरका अध्यक्ष कुशहरि मैनालीको निधनमा शुक्रबार सर्लाहीको बयलवास बजार बन्द गरिएको छ । घटनाप्रति दुःख व्यक्त गर्दै बजारका सम्पूर्ण पसल आज एक दिनका लागि बन्द गरिएको उद्योग वाणिज्य संघ ईश्वरपुरका पूर्व अध्यक्ष अमिरीलाल साहले जानकारी दिए ।

बयलवास बजारमा रहेको बोरा उद्योग बन्द गरेर घुर्कौलीस्थित घर फर्किने क्रममा गएसाँझ लालबन्दीमा मोटरसाइकल दुर्घटनाहुँदा मैनालीको मृत्यु भएको थियो । लालबन्दी नगरपालिका–६, स्थित खेल मैदान अगाडि ना २४ प ९७६९ नं. को मोटरसाइकल ठेलासँग ठोक्किएर दुर्घटना हुँदा ५२ वर्षीय मैनालीको घटनास्थलमै मृत्यु भएको ईलाका प्रहरी कार्यालय लालबन्दीले जनाएको छ ।

मृतकको शव जिल्ला अस्पताल मलंगवामा पोष्टमार्टमपश्चात आज दिउँसो बागमती खोलामा ल्याइ अन्त्येष्टि गरिएको छ । मैनाली नेपाली कांग्रेसका क्षेत्रीय प्रतिनिधी एवं विपी चिन्तन प्रतिष्ठान क्षेत्र नं. १ का सभापति समेत थिए ।

उनको पार्थिव शरीरमा पार्टीका केन्द्रीय सदस्य कल्याण गुरुङ, पार्टी जिल्ला उपसभापति सुरेन्द्रकुमार सिंह लगायतका नेताहरुले चारतारे झण्डा ओढाएर श्रद्धाञ्जली अर्पण गरेको कांग्रेस लालबन्दी नगर सभापति प्रशान्त आचार्यले बताए । बयलवासका व्यापारीले पनि बागमती पुगेर मैनालीप्रति श्रद्धाञ्जली अर्पण गरेका छन् ।

नयाँ