काठमाडौं । इंगलिश प्रिमियर लिग फुटबलमा म्यान्चेस्टर सिटीले लिभरपुलसंगको अंक दूरी कम गरेको छ । लिग अन्तर्गत सोमबार राति भएको खेलमा जित निकाल्दै सिटीले शीर्षस्थानको लिभरपुलसँगको अंक दूरी चारमा छोट्याएको हो ।
घरेलु मैदानमा भएको खेलमा सिटीले १० खेलाडीमा सीमित वुल्भरह्याम्पटन वान्डेरर्सलाई ३–० ले हरायो । सिटीको जितमा गाब्रिएल जिससले दुई गोल गरे ।
यस्तै वुल्भरह्याम्पटनका कोनर कोडीले आत्मघाती गोल गरे । १० औँ मिनेटमा जिससले गोल गर्दै सिटीलाई सुरुवाती अग्रता दिलाए ।
त्यसको ९ मिनेटपछि वुल्भ्सका विली बोलीले बर्नार्डो सिल्भासँगको ट्याकलका कारण सीधै रातो कार्ड पाएर मैदानबाट बाहिरिए ।
३९ औँ मिनेटमा पाएको पेनाल्टीमा जिससले व्यक्तिगत दोस्रो गोल गरे । ७८ औँ मिनेटमा वुल्भ्सका कोडीले आत्मघाती गोल गरेका हुन् ।
यो खेलपछि २२ औं चरणका खेल सकिएका छन् । लिभरपुल ५७ अंकसहित शीर्ष स्थानमा हुँदा दोस्रो स्थानको सिटीको ५३ अंक भएको छ । तेस्रो स्थानको टोटनह्यामको ४८ तथा चौथो स्थानको चेल्सीको ४७ अंक छ ।
