३८ वर्षे बिरामीको मृत्यु भएपछि आफन्तबाट अस्पतालमा तोडफोड

३८ वर्षे बिरामीको मृत्यु भएपछि आफन्तबाट अस्पतालमा तोडफोड

सुनील आउजी,

प्रकाशित २०७८ चैत १९ शनिबार

अत्तरिया । अस्पतालमा उपचाररत बिरामीको मृत्यु भएपछि कैलालीको अत्तरियामा रहेको पद्मा अस्पतालमा स्थानीयले तोडफोड गरेका छन् । शुक्रबार साँझ उपचारका लागि आएका बिरामीको अस्पतालको लापरबाहीका कारण मृत्यु भएको भन्दै मृतकका आफन्त र स्थानीयहरुले तोडफोड गरेका हुन् ।

इलाका प्रहरी कार्यालय मालाखेतीका प्रहरी नायब उपरीक्षक नवराज पोखरेलका अनुसार गोदावरी नगरपालिका ३ का ३८ वर्षीय विनोदकुमार बोहराको मृत्यु भएको हो । बिरामीको उपचारमा अस्पतालले लापरबाही गर्दा मृत्यु भएको भन्दै मृतकका आफन्तले अस्पताल तोडफोड गरेको पोखरेलले बताए ।

मृतकका आफन्तले ढुंगा मुडा प्रहार गर्दा अस्पतालको अगाडीको शिशा फुटेको छ भने अस्पताल परिसरमा तनावग्रस्त स्थिति सृजना भएको छ । मृतकका आफन्तहरुले अस्पतालको एम्बुलेन्ससमेत तोडफोड गरेका छन् । बिरामीको मृत्युको कारण भने खुल्न सकेको छैन ।