लिभरपुलको उपाधि यात्रा संघर्षपूर्ण, पहिलो खेलमै अंक बाँड्न वाध्य

हाम्रा कुरा

प्रकाशित २०७९ साउन २१ शनिबार

काठमाडौं । इङ्गलिश प्रिमियर लिग फुटबलको नयाँ सिजनको पहिलो खेलमा उपाधि दाबेदार लिभरपुलले अंक गुमाउन पुगेको छ । लिभरपुलले फुल्हमबाट अंक खोस्न नसकेको हो ।

शनिबार बेलुकी सम्पन्न खेलमा पाहुना टोली लिभरपुलले फुल्हमसँग २–२ गोलको बराबरीमा रोकिएको हो । तर खेलको स्थिति हेर्दा भने फुल्हमले दुई अंक गुमाएको छ । घरेलु मैदानमा दुई पटक अग्रता बनाएर पनि फुल्हमले जित हासिल गर्न सकेन । लिभरपुलले खेलमा पकड बनाए पनि फुल्हमले घरेलु दर्शकमाझ काउन्टरमा बलियो दाबेदारी प्रस्तुत गर्‍यो ।

फुल्हमका लागि दुवै गोल एलेक्सान्डर मिट्रोभिकले गरे । उनले ३२ र ७२ मिनेटमा गोल गरे । यता लिभरपुलका लागि डार्विन नुनेज र मोहम्मद सलाहले एक एक गोल गरे ।