म्यानयु सबैभन्दा कमजोर, रोनाल्डो स्तब्ध, बेन्टफोर्डसँग ४–० को हार
हाम्रा कुरा
प्रकाशित २०७९ साउन २९ आइतबार
1.1k
Shares
काठमाडौं । इङ्गलिश प्रिमियर लिग फुटबलमा उपाधि दावेदार म्यानचेस्टर युनाइटेडले लगातार दोस्रो हार बेहोरेको छ । पहिलो खेलमा ब्राइटन एण्ड हभ आल्बियनसँग २–१ ले पराजित भएको म्यानयुले शनिबार राति भएको दोस्रो खेलमा ब्रेन्टफोर्डसँग भारी अन्तरको हार बेहोरेको हो ।
ब्रेन्टफोर्डको घरेलु मैदानमा भएको खेलमा कुनै पनि समय म्यानयुले प्रभाव जमाउन सकेन । स्टार खेलाडी क्रिष्टियानो रोनाल्डोसमेत गोलविहीन रहे ।
ब्रेन्टफोर्डलाई जिताउन जोसुवा डासिल्भा, माथिअस जेनिस, बेन मी र बायर्न एमबेउमोले समान एक एक गोल गरे ।
जितपछि ब्रेन्टफोर्ड २ खेलबाट ४ अंक जोड्दै तेस्रो स्थानमा छ । लगातारको हारसँगै युनाइटेड पुछारमा छ ।
यस्तै, गए राति नै भएको खेलमा साविक विजेता म्यानचेस्टर सिटी र आर्सनलले सहज जित निकालेका छन् ।
सिटीले घरेलु मैदानमा बर्नमाउथलाई ४–० ले पराजित गर्यो । लगातार दोस्रो जित निकाल्ने क्रममा आर्सनलले लेस्टर सिटीलाई ४–२ ले हरायो ।
यस्तै, अन्य खेलमा साउथह्याम्पटन र लिड्स युनाइटेडले २–२, ब्राइटन र न्यूकासल तथा उल्भ्स र फुल्हमले गोलरहित बराबरी खेले ।
