काठमाडौं । इङ्गलिश प्रिमियर लिग फुटबल अन्तर्गत आइतबार राति भएको खेलमा चेल्सी लिड्स युनाइटेडसंग स्तब्ध हुँदा म्यानचेस्टर सिटी भने न्युक्यासल युनाइटेडसँग बराबरीमा रोकिएको छ ।
लिड्सले चेल्सीलाई ३–० ले पराजित गर्यो । लिड्सको जितमा ब्रेन्डेन आरोन्सन, रोड्रिगो मोरेना र ज्याक ह्यारिसनले एक–एक गोल गरे । खेलको ३३औं मिनेटमा आरोन्सनको गोलबाट घरेलु टिमले अग्रता लिएको थियो । त्यसको पाँच मिनेटपछि मोरेनाले हेडर गोलमार्फत लिड्सको अग्रता दोब्बर पारे । यस्तै, ६९औं मिनेटमा ह्यारिसनले तेस्रो गोल गरे ।
लिड्सले पछिल्लो पटक चेल्सीलाई सन् २००२ मा २–० ले पराजित गरेको थियो । जितसँगै तीन खेलबाट सात अंक जोडेको लिड्स तेस्रो स्थानमा उक्लिएको छ ।
थोमस टचेलको प्रशिक्षणमा रहेको चेल्सीको यो पहिलो हार हो । तीन खेलबाट चार अंक जोडेको चेल्सी तालिकाको १२औं स्थानमा छ ।
खेलको पाँचौं मिनेटमा इल्के गुन्डोगानले गोल गर्दै सिटीलाई अग्रता दिलाए । तर, खेलको २८औं मिनेटमा मिगुएल अल्मिरोन, ३९औं मिनेटमा कलुम विल्सन र ५४ औं मिनेटमा कप्तान केइरन ट्रिपियरले फ्रिकिकबाट गोल गरेपछी न्युकासललाई ३९१ को अग्रता लियो ।
खेलको ६४औं मिनेटमा एर्लिङ हालाण्ड र ६४औं मिनेटमा बेर्नार्डो सिल्भाले गोल गर्दै सिटीलाई ३–३ गोलको बराबरीमा ल्याए ।
बराबरीसँगै सिटीले ३ खेलमा ७ अंक जोडेर दोस्रो स्थानमा छ । न्युकासल ५ अंक जोडेर छैटौं स्थानमा छ ।
आइतबार रातिको अर्को खेलमा ब्राइटन एन्ड हभ आल्बियनले वेष्टह्याम युनाइटेडलाई २–० ले पराजित गर्यो । तेस्रो चरणको खेल हुँदा आर्सनल सतप्रतिशत नतिजासहित ९ अंकबाट शीर्ष स्थानमा छ । अहिलेसम्म आर्सनलमात्र सतप्रतिशत नतिजा ल्याउने टिम बनेको छ ।
म्यानसिटी, टोटनह्याम, लिड्स युनाइटेड र ब्राइटनको समान ७ अंक छ । म्यानचेष्टर युनाइटेड र वेष्ट ह्याम युनाइटेड युनाइटेड अंकविहीन छन् ।
