प्रधानमन्त्री थ्री नेसन्स कप फुटबलको उपाधि नेपाललाई
हाम्रा कुरा
प्रकाशित २०७९ चैत १७ शुक्रबार
981
Shares
काठमाडौं । प्रधानमन्त्री थ्री नेसन्स कप फुटबल प्रतियोगिताको उपाधि नेपालले जितेको छ । त्रिपुरेश्वरस्थित दशरथ रंगशालामा शुक्रबार बेलुकी सम्पन्न फाइनलमा लाओसलाई २–१ गोल अन्तरले हराउँदै नेपालले उपाधि जितेको हो ।
लोओसले बनाएको एक गोलको अग्रता उल्टाएर नेपाल च्याम्पियन बन्न सफल भएको हो । नेपालको जितमा आयुष घलान र मनिष डाँगीले एक एक गोल गरे । लाओसका फोउचाङभोङ साङ्भिले शुरुआती गोल गरे ।
१७ औं मिनेटमा फोउचाङभोङले गोल गर्दै लाओसलाई अग्रता दिलाएका थिए । २४ औं मिनेटमा आयुषले गोल गर्दै नेपाललाई १–१ गोलको बराबरीमा ल्याएका थिए ।
८७ औं मिनेटमा मनिषले गोल गर्दै नेपाललाई २–१ को जित दिलाए । उपाधिसँगै नेपालले ५ हजार अमेरिकी डलर प्राप्त गरेको छ भने लाओसले ३ हजार डलर प्राप्त गरेको छ ।
लिग चरणमा नेपालले लाओसलाई २–० ले हराएको थियो । तेस्रो टिम भुटान तेस्रो हुँदै उपाधि भिडन्तबाट बाहिरिएको थियो । भु्टान लाओससँग २–१ ले पराजित भएको थियो भने नेपालसँग १–१ को बराबरी गर्न सफल भएको थियो ।
नेपालले घरेलु मैदानमा दोस्रो पटक थ्री नेसन्सको उपाधि जितेको हो । २०७७ सालमा भएको प्रतियोगिताको फाइनलमा बंगलादेशलाई हराउँदै नेपाल च्याम्पियन बनेको थियो ।
