पोखरा । पोखराको नागढुंगास्थित होटलमा अचेत भेटिएकी सुकुमाया विकको हत्या आरोपमा एक युवकलाई प्रहरीले ८ महिनापछि पक्राउ गरेको छ । पक्राउ पर्नेमा बाग्लुङ गल्कोट नगरपालिका वडा नं. ९ मल्मका २९ वर्षीय सञ्जय विक छन् ।
उनलाई साउन २ गते बिहान गैँडाकोट २ हर्कपुरस्थित डेराबाट पक्राउ गरिएका कास्की प्रहरीका सूचना अधिकारी डीएसपी वसन्तकुमार शर्माले जानकारी दिए ।
उनी श्रीमती र छोरालाई पोखरामै छाडेर गैँडाकोटमा कोठा लिएर लुकिछिपी बस्दै आएको प्रहरीले जनाएको छ ।
प्रहरीका अनुसार २०८० मंसिर ५ गते पोखरा ८ नागढुङ्गास्थित शिला रेष्टुरेन्टमा काम गर्दै आएकी ३२ बर्षीया सुकु विक युनिक होटलमा अचेत अवस्थामा भेटिएकी थिइन् । उनलाई उद्धार गरी चरक मेमोरियल अस्पताल पुर्याएकोमा चिकित्सकले मृत घोषणा गरेको थियो ।
प्रहरीका अनुसार सञ्जय सुकुसँग सँगै बसेको र उनले सुकुको घाँटी थिची हत्या गरेको विभिन्न अनुसन्धानले पुष्टि गरेको छ ।
प्रहरीले उनीबिरुद्ध २०८० पुसमा कास्की जिल्ला अदालतबाट पक्राउ अनुमति लिएर अनुसन्धान प्रक्रिया अघि बढाएको थियो ।
उनीमाथि २०७२ असारमा चोरी र २०७३ भदौमा अभद्र व्यवहार कसूरमा मुद्दा चलेको अभिलेखबाट देखिएको प्रहरीले जनाएको छ ।