काठमाडौँ । फ्रान्सको मौसम विज्ञान एजेन्सीले पेरिस र वरपरका क्षेत्रहरूमा ओलम्पिक खेलहरू आयोजना गर्ने क्रममा मङ्गलबार आँधी र ३५ डिग्री सेल्सियसको उच्च तापक्रमको सम्भावना रहेको चेतावनी जारी गरेको छ ।
फ्रान्सका अन्य ओलम्पिक स्थलहरूमा तापक्रम बढिरहेकाले एजेन्सीले राजधानीका लागि ‘पहेँलो चेतावनी’ (चार स्तरमा दोस्रो) राखेको छ । तातो अवस्था रातभर रहने पूर्वानुमान गरिएकाले विशेषरूपमा पेरिसका लागि पहेँलो चेतावनी जारी गरिएको थियो ।
एजेन्सीका अनुसार मध्यम चेतावनी स्तरको अर्थ मानिसहरूले खेल खेल्दा वा अन्य शारीरिक गतिविधिमा संलग्न हुँदा गर्मीको प्रभावप्रति ‘सतर्क’ हुनुपर्छ ।
मङ्गलबार दिउँसो बोर्डोमा स्पेन र इजिप्टबीच फुटबल खेल हुँदा अवस्था अझ तनावपूर्ण हुनसक्छ । मौसम एजेन्सीले मङ्गलबार दक्षिणपश्चिमी यस सहरमा ३८ डिग्री सेल्सियससम्म पुग्न सक्ने बताएको छ ।
लियोनका लागि यस्तै प्रकारको उच्च तापक्रमको पूर्वानुमान गरिएको छ । लियोनमा युक्रेनका फुटबलरहरू मङ्गलबार अर्जेन्टिनासँग भिड्नेछन् ।
ओलम्पिक सुटिङ कार्यक्रमहरू आयोजना गर्ने केन्द्रीय सहरमा मङ्गलबार तापक्रम ३६ डिग्री सेल्सियस पुग्नसक्ने पूर्वानुमानकर्ताहरूले बताएका छन् ।
खेलहरूअघि केही खेलाडीले उच्च तापक्रममा प्रतिस्पर्धा गर्ने शारीरिक हानि र गर्मीको स्ट्रोकको जोखिमलाई ध्यानमा राख्दै कार्यक्रमको समायोजन गर्न आग्रह गरेका थिए ।
