भक्तपुर । काउन्सिल अफ बोर्डस अफ स्कूल एक्जामिनेशन अफ इण्डिया(कोब्से)को ४६ औँ सम्मेलन नेपालमा बुधबार हुने भएको छ ।
राष्ट्रिय परीक्षा बोर्डले सानोठिमीस्थित बोर्डको कार्यालयमा सोमबार आयोजना गरेको पत्रकार सम्मेलनमा काभ्रेपलाञ्चोकको धुलिखेलमा हुने सात देशको सहभागिता रहने सम्मेलन नेपालको परीक्षा प्रणालीको वैज्ञानिक रुपमा सुधार गर्नका लागि अवसरका रुपमा आएको बोर्डका अध्यक्ष प्रा डा चन्द्रमणि पौडेलले बताए ।
'इनोभेशन इन इभ्यालुएशन' भन्ने मूल नाराका साथ यही कात्तिक १६ गतेदेखि १८ गतेसम्म हुने सम्मेलनमा आठ देशमा रहेका परीक्षा बोर्डका पदाधिकारीको सहभागिता रहनेछ । सम्मेलनमा नेपाल, भुटान, मौरिसस, पाकिस्तान, सिंगापुर, बेलायत र भारतका गरी ६० बोर्डका पदाधिकारी र परीक्षा विज्ञको भेला हुने बोर्डका सदस्य सचिव लक्ष्मीराम पौडेलले बताए ।
सम्मेलनमा नेपालका तर्फबाट शिक्षाविद् एवं त्रिविका प्रा डा गणेशबहादुर सिंह र प्रा डा वासुदेव काफ्लेले विशेष शिक्षामा परीक्षा विषयमा कार्यपत्र प्रस्तुत गर्ने छन् । परीक्षा बोर्डका अध्यक्ष प्रा डा पौडेलले आठ विषयको तीन घण्टाको परीक्षामार्फत गरिने विद्यार्थीको मूल्यांकन वैज्ञानिक एवं व्यावहारिक नभएकाले परीक्षा प्रणालीलाई सुधार गर्नका लागि सम्मेलनले धेरै सहयोग पुर्याउने बताए । "अन्य देशमा भएका परीक्षा प्रणालीका बारेमा जानकारी लिन पाइने र यसले नेपालको माध्यमिक तहको परीक्षा प्रणालीलाई ग्रेडिङ प्रणालीबाट अझै सुधारमा लैजाने बाटो पहिल्याउन सजिलो हुनेछ" उनले विश्वास व्यक्त गरे ।
माध्यमिक तहको अन्तिम परीक्षा लिने जिम्मेवारी पाएको राष्ट्रिय परीक्षा बोर्डले अहिलेको परीक्षा प्रणाली ठीक वा बेठीक भन्ने कुरा शिक्षा क्षेत्रमा बहसको रुपमा उठेको बेलामा हुन लागेको सम्मेलन उपलब्धिमूलक हुने बताइएको छ । अध्यक्ष प्रा डा पौडेलले हालको परीक्षा प्रणाली पनि पूर्णरुपमा व्यावहारिक नभएको औल्याउँदै सरकारबाट निर्णय भइसकेको विषयगत परीक्षाको तयारीलाई बोर्डले छिट्टै कार्यान्वयनमा ल्याउने बताए ।
