काठमाडौं । काठमाडौं महानगरले, राजधानीका अरु ठाउँका तुलनामा मुख्य बजार क्षेत्र न्यूरोड, पुतली सडक, बागबाजर र जमलका स्थानीय स्वास्थयप्रति सजग नभएको बताएको छ । कारण यो हो कि यी क्षेत्रका स्थानीयले अरु ठाउँका जनताको तुलनामा लुकिछिपि सडकमा बढी फोहर फाल्ने गरेका छन् ।
काठमाडौं महानगरका वातावरण व्यवस्थापना विभाग कार्यसंचालन शाखा प्रमुख तथा नगरी प्रहरी निरीक्षक मीनबहादुर थापाका अनुसार, गएको साउनदेखि अहिलेसम्म कार्वाहीमा परेका ८४ जनामध्ये अधिकांश न्यूरोड, पुतली सडक, बागबाजर र जमलमा बस्नेहरु छन् । महानगरले चालुआर्थिक वर्षमा तोकिएको ठाउँभन्दा अरु ठाउँमा फोहर फाल्ने ८४ जनलाई कार्वाही गरेर २ लाख ३७ हजार रुपैयाँ डाँडेको छ ।
महानगरको गाडी फोहर लिन आउँदा चुपचाप बस्ने र विशेष गरी रातसाँझ पारेर जथाभावी फोहर फाल्नेलाई कार्वाही गरिएको थापाको भनाइ छ । काठमाडौं महानगरको वातावरण विभागले जथाभावी फोहर फाल्नेबाट कम्तिमा ५०० रुपैयाँदेखि बढीमा एक लाख रुपैयाँसम्म जरिवाना तिराउने नियम लागुु गरेको छ । महानगरले हरेक दिन उपत्यकाको ८०० टन फोहर तह लगाउँदै आएको छ ।
