परीक्षा नियन्त्रण कार्यालय सानोठिमीले सार्वजनिक गरेको २०७४ सालको माध्यमिक शिक्षा परीक्षा कक्षा १० (एसइई) परीक्षामा भक्तपुरको महेन्द्र विद्या आश्रमका छात्र सार्थक मल्लले देशभरबाटै सबै भन्दा बढी अंक ल्याएको दावी गरिएको छ । उनकाे विद्यालयले नेपाल टप गरेकाे भनि दावी गरेकाे छ । भक्तपुरको सूर्यविनायकस्थित महेन्द्र विद्या आश्रमबाट एसइई परीक्षा दिएका सार्थक मल्लले जिपिए चार ल्याएको प्रधानाध्यापक अनिल श्रेष्ठले जानकारी दिए । जिपिए ४ ल्याउने मल्ल नै देशव्यापी रुपमै पहिलो भएको उहाँले दाबी श्रेष्ठले गरेका छन् । हामीले जिपिए चार ल्याउने सार्थक मल्लसँग कुराकानी गरेका छौँ । 

० एसईई 'टपर' हुन्छु भन्ने अपेक्षा गर्नुभएको थियो ?
– अपेक्षा गरेको थिइँन, तर भएछु । सोसल बिग्रेजस्तो लागेको थियो, तर राम्रै भएको रहेछ ।

० अाफुले दिएकाे परीक्षाबाट कस्तो परिणामकाे अपेक्षा गर्नुभएको थियो ?
– ३ दशमलब ९५ सम्म आउँछ जस्तो लागेको थियो । सोचेभन्दा राम्रो भएछ ।

० कत्तिकाे पढ्नु हुन्थ्यो ?
– पढ्न चाहिँ धेरै पढ्थे, त्यस्तै हो ।

० रुटिन बनाएर पढ्नुहुन्थ्यो ?
– रुटिन बनाउनु त परिहाल्यो, रुटिनमा अभ्यास धेरै थियो ।

० पढाइमा दैनिक कति समय दिनुहुन्थ्यो ?
– रुटिन थियो, विषय हेरेर समय विनियोजन गरेको थिएँ ।

० पढ्दा गाह्रो भयो भने कसको सहयोग माग्नुहुन्थ्यो ?
– दिदी हुनुहुन्थ्यो, टिचरहरु हुनुहुन्थ्यो । उहाँहरुसँग सोध्थे । सबैबाट पूरा सहयोग पाएँ ।

० यसकाे श्रेय कसैलाई दिन चाहनुहुन्छ ?
– श्रेय आमाबुवा र टिचरहरुलाई दिन्छु । आफूले पनि मेहनत गरें ।

० सफलता पाउनका लागि टिउसन पढ्नुपर्छ ?
– टिउसन पढन जरुरी छैन, सबै कुरा आफूमै निर्भर रहन्छ । यो कुरा चाहिँ विद्यार्थीको क्षमतामा निर्भर रहन्छ ।

० अब, तपाईंको लक्ष्य ?
– मेरो पहिलेदेखिको लक्ष्य सफ्टवेयर इन्जिनियर बन्ने हो । बुढानीलकण्ठबाटै ‘ए’ लेबल गरिन्छ, त्यसपछि सफ्टवेयर इन्जिनियर पढिन्छ ।

० पढाइबाहेक अरु के कुरामा रुचि छ ?
– अन्य कुरामा रुचि राख्नैपर्छ । किनभने त्यो पनि विद्यार्थीका लागि जरुरी नै हुन्छ । पढाइ मात्र भन्नुहुँदैन, दिमागलाई फ्रेस पनि गराउनुपर्छ । तर, मेहनत चाहिँ गर्नैपर्छ ।

० जुनियरलाई तपाईंको सन्देश ?
– सबै कुरा अभ्यास हो, अभ्यास भयो भने हामीले सफलता पाउन सक्छौं । पढाइ भनेको बुझ्ने कुरा हो, नबुझी धेरै घोक्नु हुँदैन । घोक्यो भने माक्स चाहिँ आउँछ, तर पढाइ भन्ने कुरा बुझ्नुपर्छ ।

० यही सूत्र प्रयोग गर्नुभएको हो ?
– हो, पढाइ भनेको बुझ्नुपर्छ । बुझ्न कठिन हुन्छ, त्यस्तो बेलामा टिचरहरुको सहयोग लिनुपर्छ । कक्षामा बढी प्रश्न सोध्ने, अभ्यास बढी गर्नाले पनि बुझिन्छ । घरमा पनि बुझ्ने प्रयास गरेर पढ्नुपर्छ ।

० फुटबल हेर्नुहुन्छ ?
– हेर्छु, म फ्रान्सको समर्थक हुँ ।