स्वास्थ्य बीमा समस्या सरकारले तत्काल संसदलाई जानकारी गराउनु पर्छ : सांसद दाहाल [भिडियो]
हाम्रा कुरा
प्रकाशित २०८२ माघ २३ शुक्रबार
808
Shares
काठमाडौँ । राष्ट्रिय सभामा नेकपा (एमाले) की सांसद तुलसाकुमारी दाहालले स्वास्थ्य बीमामा देखिएको समस्याबारे स्पष्ट जानकारी संसदलाई गराउन सरकारसँग माग गरेकी छन्।
शुक्रबार बसेको राष्ट्रिय सभा बैठकको शून्य समयमा बोल्दै उनले सो माग गरेकी हुन् । अस्पतालहरूमा बजेटको अभाव भन्दै सो कार्यक्रम बन्द भइरहेकाले सरकारले सो सम्बन्धमा के भएको हो भनि संसदमा जानकारी गराउनुपर्ने सांसद दाहालको भनाइ थियो ।
उनले सर्वसाधारणलाई धेरै राहत भएको सो कार्यक्रमका लागि आवश्यक बजेटको व्यवस्था गर्ने कुरामा सरकारले ढिलाई गर्न नहुने बताए ।
सांसद दाहालले भने, ‘स्वास्थ्य बीमाको विषयमा सर्वसाधारण जनताले उपयोग गरिरहेको विषयवस्तु अहिले अस्पतालहरूले सरकारले बजेट नदिएको कारण बन्द गर्नुपरेको भन्ने समाचारहरू बाहिर आइरहेका छन्। यस विषयमा सम्माननीय प्रधानमन्त्रीज्युले चासो लिएको भन्ने पनि सुनियो। यसको व्यवस्थापनका लागि के भएको हो, जानकारी गराउन म सरकारसँग माग गर्दछु ।’
प्रधानमन्त्री सुुशीला कार्कीले पनि सो सम्बन्धमा चासो दिँदै आवश्यक स्रोतको व्यवस्था गर्ने प्रतिवद्धता व्यक्त गरेकी थिइन् । सांसद दाहालले जनसरोकारका त्यस्ता विषयहरुको व्यवस्थापनमा सरकारले तत्काल निर्णय गर्न आवश्यक रहेको बताए ।
