काठमाडौं । प्रतिनिधि सभाकी उपसभामुख इन्दिरा रानामगरले आफू राजनीतिक भाषा सिक्दै गरेको बताएकी छन् । नेपाल मानव धर्म सेवा समितिले आयोजना गरेको “गुरु पूजा महोत्सव २०८०” को उद्घाटन गर्दै उपसभामुख मगरले यस्तो बताएकी हुन् ।

उपसभामुख मगरले भनिन्, 'म पनि सङ्घर्षशील महिला हुँ । म राजनीतिज्ञ होइन ।  म राजनीतिक भाषाहरू सिक्दै छु । सभामा गरिब, दुःखी, पीडितका लागि प्रतिपक्षमा भूमिका निर्वाह गर्दैछु ।'

उपसभामुख मगरले आफ्नो जीवन सङ्घर्ष सुनाउँदै भनिन्,' मैले तीन दशक बढी समय देखि पीडित महिलालाई सहयोग गर्दै आएकी छु । मैले शुरुका वर्षमा पढ्न पाइन । एकै पटक पाँच कक्षमा भर्ना भए । मैलाई यसले केही जान्दिन भनेर कक्षमा हेला पनि गर्थे । तर सङ्घर्ष गर्दै जीवनमा सफलता पाए । उमेरले गर्नलाई छेक्दैन यो एक उदाहरण हो ।'  

उपसभामुख मगरले कोरोना कालमा मानव धर्म सेवा समितिसँग सहकार्यमा गरिब विपन्नहरूलाई खाना खुवाएको स्मरण गरिन् । उनले भनिन्, कोरोना कालमा दैनिक एक हजार जनालाई खाना खुवायौ । १९ महिनासम्म खाना पकाए खुवाएको अनुभव छ ।' उपसभामुख मगरले प्रिजनर्स एसिस्टेन्स नेपाल नामक संस्था सञ्चालन गर्दै आएकी छन् । उनीको नाम बीबीसीले प्रेरणादायी तथा सिर्जनाशील महिलाहरूमा समेटेको छ ।

 
महोत्सवमा समितिका केन्द्र प्रमुख महात्मा चमेली बाइजीले गुरुको महिमा, भौतिक जीवनमा अध्यात्मको महत्त्व रहेको बताइन्। महात्मा बाइजीले हाम्रा शास्त्रमा भएका कुरालाई सबैले मनन गर्नु पर्ने र शास्त्रमा उल्लेख गरिएको गुरु शिष्यका उदाहरणबाट हामीले पनि धेरै कुरा सिक्न सकिने बताइन् ।

चेतन शरीर भएका गुरुले मात्र ज्ञान र भक्तिको कुरा सिकाउन सकिने भएकोले चेतन गुरुलाई मान्न पनि उनले सबैलाई प्रेरणा दिइन् । कार्यक्रममा बोल्दै उनले भनिन्, ' शास्त्रहरूले गुरुको महिमा गाउँदै भनेका छन् । बंदउँ गुरु पद कंज कृपा सिंधु नररूप हरि। महामोह तम पुंज जासु बचन रबि कर निकर॥ म ती गुरु महाराजको कमल चरणको पूजा गर्छु, जो दयाका सागर र पुरुषरूपमा श्रीहरि हुनुहुन्छ र जसको वाणी सूर्यकिरणको समूहजस्तै भ्रमको घनघोर अन्धकारलाई नष्ट गर्नका लागि छन्। '

उनले थपिन्,' आज सबैले गुरुको आशीर्वाद अर्पण गर्नुपर्छ । वैदिक सनातन धर्म मान्नेले आज आफ्नो गुरुको आशिर्विद लिइरहेका छन् ।  गुरुले हामीलाई ब्रम्ह साक्षात्कार हुने ज्ञान दिनुभएको छ ।'

कार्यक्रममा महात्मा लता बाइजीले गुरुभक्तका लागि गुरु पूजा भन्दा ठुलो पर्व अरू नहुने बताइन् । आफू भित्र लुकेको शक्तिलाई चिन्नको लागि सद्गुरुको शरणमा जानुपर्ने शास्त्रहरूमा उल्लेख भएको बताइन् ।

अर्की प्रमुख अतिथि शहरी विकास मन्त्री सिता गुरुङले आफू गुरु पूर्णिमाको दिन समितिको कार्यालयमा आउन पाउँदा खुशी लागेको बताइन् ।  उनले सबै नेपालीहरू एकै सूत्रमा बाँधिएर रहेको बताइन् । उनले भनिन्,' संसारमा आउँदा हामी खाली हात आयौ खाली नै जान्छौँ ।  अध्यात्मलाई जोड्न सके समृद्ध देश बनाउन सकिन्छ। '

वेदलाई ऋग्वेद, यजुर्वेद, सामवेद र अथर्ववेद गरी चार भागमा विभाजन गरी यसको अर्थ बुझाउन सरल संस्कृत भाषामा १८ पुराण र १८ उपपुराणको रचना गर्ने वेद व्यासको सम्झनामा व्यास जयन्ती पनि मनाइन्छ। आषाढ शुक्ल पूर्णिमाकै दिन वेद व्यास जन्मिएकाले यसै दिन व्यास जयन्ती मनाउने गरिएको हो । गौतम बुद्धले आजकै दिन धर्मचक्र प्रवर्तन अर्थात् पहिलो उपदेश दिएका थिए ।