काठमाडौँ । प्रतिनिधि सभाको बैठक अहिले बसिरहेको छ । तर बैठकको शुरुमै एमालेका सांसदहरु उठेर अवरोध गरेका थिए ।
एमालेका सांसद पदम गिरीले फागुन ६ देखि बालकुमारी घटनाका दोषी भौतिक मन्त्री र दुई जनाको ज्यान लिन आदेश दिने गृहमन्त्रीको राजीनामा मागिरहेको बताए ।
त्यस्तै अख्तियारले बोलाएका स्वास्थ्य मन्त्रीलाई पदमा बसिरहने नैतिकता नभएको भन्दै एमालेले अवरोध गरेको हो ।
बैठकमा सभामुख देवराज घिमिरेले राजनीतिक दल सम्बन्धी (दोस्रो संशोधन) विधेयक, २०८० लाई प्रस्तुत गर्न अनुमति माग्ने प्रस्तावमाथि प्राप्त विरोधको सूचनालाई निर्माणार्थ प्रस्तुत गर्ने कार्यतालिका छ ।
त्यस्तै उपप्रधान एवं गृहमन्त्री नारायणकाजी श्रेष्ठले राजनीतिक दल सम्बन्धी (दोस्रो संशोधन) विधेयक, २०८० प्रस्तुत गर्ने कार्यक्रम रहेको छ ।
यसअघिको शुक्रबारको बैठक तनावपूर्ण हुँदै स्थगित भएको थियो । सत्ता र प्रतिपक्षका सांसदहरु आरोप प्रत्यारोपमा उत्रिएसँगै बैठक स्थगित भएको थियो ।
शुक्रबारकै बैठकबाट संघीय संसदका महासचिव पद्मप्रसाद पाण्डेयको नागरिकता र राहदानीको विषय संसदमा प्रवेश गरेको थियो । माओवादी केन्द्रका सांसद माधव सापकोटाले महासचिव पाण्डेयको नागरिकता र राहदानीको विषयमा प्रश्न उब्जाएका थिए ।
शुक्रबार बैठक शुरु भएलगत्तै सत्ता र प्रतिपक्षी दलका सांसदहरु आरोप–प्रत्यारोपसहित प्रतिशोधमा उत्रिएका थिए । प्रतिपक्षी दलका सांसदहरुले सरकार र मन्त्री तथा सत्तारुढ दलप्रति आक्रोशसहित अभिव्यक्ति दिएका थिए ।
प्रतिपक्षी दलका सांसदको आक्रोश र आरोपयुक्त अभिव्यक्तिको प्रतिवाद गर्ने क्रममा सांसद सापकोटाले महासचिव पाण्डेयको नागरिकता र राहदानीको विषय उठाएका हुन् ।
राष्ट्रिय सभा अध्यक्ष गणेशप्रसाद तिमिल्सिना र सभामुख देवराज घिमिरेले संसदको महासचिवमा पाण्डेयलाई सिफारिस गरेपछि राष्ट्रपति रामचन्द्र पौडेलले महासचिवमा नियुक्त गरेका थिए ।
पाण्डेयको विषयमा राष्ट्रपतिले छलफल चलाउँदासमेत तिमिल्सिना र घिमिरेले मिडियाबाजी गरेका थिए । जबकि उनको नागरिकता र राहदानी छानबिन भइरहेको थियो । समितिको छानबिनलाई प्रभावित पार्नेगरी मिडियाबाजी भएसँगै राष्ट्रपतिले नियुक्त गरेका थिए ।
यद्यपि गलत सल्लाह दिएको भन्दै राष्ट्रपति सल्लाहकारहरुसँग रिसाएकासमेत थिए ।
तिमिल्सिना र घिमिरे एमालेबाट सभाध्यक्ष र सभामुखमा चयन भएका हुन् ।
एमालेका प्रमुख सचेतक पदम गिरी र सांसद योगेश भट्टराईसहित प्रतिपक्षी दलका सांसदको सरकार र मन्त्री तथा सत्तारुढ दलप्रति आरोपयुक्त अभिव्यक्ति आएपछि माओवादी केन्द्रका सांसद सापकोटाले संघीय संसद् सचिवालयका महासचिव पाण्डेयको तीनवटा नागरिकताको विषय उठाएका हुन् ।
‘म भन्न चाहन्छु, प्रतिपक्षका साथीहरूलाई संसद्का महासचिवको तीन नागरिकता र दुई वटा राहदानीको कुरा तपाईंहरूले उठाएको कुरामा थप्नुहोस् न । संसद्मा हाम्रो महासचिवको तीनवटा नागरिकता छ, दुई वटा पार्सपोर्ट छ । तपाईंहरूले त्यो थप्नुहुन्न,’ सांसद सापकोटाले बैठकमा भने ।
महासचिव पाण्डेयको नागरिकता र राहदानीबारे सञ्चार माध्यममा समाचार आइरहेका बेला शुक्रबार संसदमा समेत प्रवेश भएको हो ।
