जेनेभा। कङ्गोमा मंकिपक्सको प्रकोपले यस वर्षको सुरुदेखि पाँच सय ४८ को ज्यान लिइसकेको त्यहाँका स्वास्थ्यमन्त्रीले बिहीबार जानकारी दिएकम छन् । उनले सबै प्रान्त यसको भाइरसबाट प्रभावित भएको बताए ।
स्वास्थमन्त्री स्यामुएल–रोजर कम्बाले भने, “हालैको महामारी विज्ञान रिपोर्टअनुसार हाम्रो मुलुकले यस वर्षको सुरुदेखि १५ हजार छ सय ६४ सम्भावित घटना र पाँच सय ४८ जनाको मृत्यु भएको रेकर्ड गरेको छ ।”
प्रजातान्त्रिक गणतन्त्र कङ्गो २६ प्रान्त मिलेर बनेको छ र यहाँ करिब १० करोड जनसङ्ख्या छ । मंकिपक्सबाट सबैभन्दा प्रभावित प्रान्तहरूमा दक्षिणी किभु, उत्तरी किभु, त्सोपो, इक्वेटर, उत्तरी उबाङ्गी, त्सुपा, मोङ्गला र सङ्कुरु रहेका छन् ।
विश्व स्वास्थ्य सङ्गठन (डब्ल्युएचओ) ले मंकिपक्सको प्रकोपलाई अन्तर्राष्ट्रिय चिन्ताको सार्वजनिक आपत्काल घोषणा गरेको छ ।
पूर्वी प्रजातान्त्रिक गणतन्त्र कङ्गोमा यस रोगको फैलावटमा भएको द्रुत वृद्धि साथै छिमेकी देशमा पनि यसको पहिचान भएसँगै यसलाई राष्ट्रिय आपत्काल घोषणा गरिएको हो ।
डब्ल्युएचओका प्रमुख टेड्रोस एड्हानोम गेब्रेयससले यो अन्तर्राष्ट्रिय चिन्ताको सार्वजनिक स्वास्थ्य आपत्काल अन्तर्राष्ट्रिय स्वास्थ्य कानूनअन्तर्गत उच्चस्तरको चेतावनी भएको बताए ।
“आज आपत्कालीन समितिको बैठकले मंकिपक्स रोगलाई अन्तर्राष्ट्रिय चिन्ताको सार्वजनिक स्वास्थ्य आपत्काल भएको सुभाव दिएको छ । मैले त्यो सुझाव स्वीकार गरेको छु । अन्तर्राष्ट्रिय चिन्ताको सार्वजनिक स्वास्थ्य आपत्काल अन्तर्राष्ट्रिय स्वास्थ्य कानुनअन्तर्गत उच्चस्तरको चेतावनी हो”, टेड्रोसले मंकिपक्सबारे भएको आपत्कालीन समितिको बैठकको नतिजाबारे जनाकारी गराउँदै भने ।
यस वर्ष १० अफ्रिकी राष्ट्रमा मंकिपक्स पत्ता लागेको रोग नियन्त्रण र रोकथामका लागि डब्ल्युएचओका अफ्रिकी केन्द्रहरूले गत हप्ता बताएका छन् ।
“मंकिपक्सको सङ्क्रमण अफ्रिकाभित्र र त्योभन्दा बाहिर फैलन सक्ने सम्भावना रहेकाले यो चिन्ताजनक अवस्था हो”, टेड्रोसले भने ।
प्रकोपलाई नियन्त्रण गर्न एक समन्वयकारी अन्तर्राष्ट्रिय प्रतिक्रिया आवश्यक रहेकोमा उनले जोड दिए ।
उनले कङ्गोमा मंकिपक्सको मामिलामा भएको वृद्धिको मूल्याङ्कन गर्न गत हप्ता आपत्कालीन समिति गठन गरेको जानकारी दिए ।
“हामीले स्वास्थ्य कार्यकर्ताहरूलाई तालिम दिइरहेका छौँ र सङ्क्रमितलाई उचित हेरचाह प्रदान गर्न चिकित्सकलाई सहयोग गरिरहेका छौँ, हामीले प्रभावित देशमा खोपको पहुँचका साथै आवश्यक सहयोग गरिरहेका छौँ”, उनले भने ।
गत सेप्टेम्बरदेखि मध्य अफ्रिकी राष्ट्र कङ्गोमा मंकिपक्स सङ्क्रमण बढिरहेको छ । हाल छिमेकी देशहरूमा पनि यसको सङ्क्रमण पत्ता लागेको छ ।
डब्ल्युएचओले सन् २०२२ मा ७० भन्दा बढी देशमा फैलिएपछि मङ्कीपक्स भनेर चिनिने मंकिपक्सलाई विश्वव्यापी आपत्काल घोषणा गरेको थियो ।
