अद्भूत, अविश्मरणीय र अद्धितीय पेरिस ओलम्पिकको उद्घाटन [फोटोफिचर]
कहिले छ नेपाली खेलाडीहरुको खेल ?
हाम्रा कुरा
प्रकाशित २०८१ साउन १२ शनिबार
721
Shares
काठमाडौँ । ओलम्पिक खेलुकदको ३३ औँ संस्करण फ्रान्सको पेरिसमा चलिरहेको छ । पेरिस ओलम्पिक खेलकुद प्रतियोगिताको उद्घाटन शुक्रबार राति भव्यपूर्वक सकिएको छ । जुन अहिलेसम्मकै अद्भूत, अविश्मरणीय र अद्धितीय भनी विश्लेषण भइरहेको छ ।
अझ कतिपयले त यी शब्दहरुसमेत उक्त उद्घाटनको बयान गर्नका लागि काफी नहुने बताइरहेका छन् ।
डुङ्गामा चढेका हजारौैँ प्रतियोगीसहित सहभागी देशका प्रतिनिधिहरु सेन नदीमा बिहार गर्दै पेरिसको मध्यभाग हुँदै परेड गरेर गरिएको उद्घाटन ।
जहाँ ६ किलोमिटरको दूरी ९४ डुंगा, २०६ देशका प्रतिनिधि, ६ हजार ५ सय खेलाडी दुई घण्टासम्म सयर गरेका थिए ।
किनारामा बसेका तीन लाख भन्दा बढी दर्शक, दुई लाख मानिसले सिन नदीको पुलमा, किनारामा बनेका अपार्टमेन्टको बालकोनीमा बसेर हेरेका दर्शक ।
पप स्टार लेडी गागा, आया नाकामुका रसेलिनडायनको मनमोहक प्रस्तुति तथा एफिल टावरमा कमालको लेजर लाइट ।
पानीको फोहराले यसमा झन् चार चाँद लगाइदिएको थियो ।
‘सिटी अफ लभ’ भनेर चिनिने पेरिसमा सय वर्षपछि फर्केको ओलम्पिक खेलकुदले दिल खोलेर स्वागत गरेको छ ।
ओलम्पिक खेलुकदको इतिहासमा पहिलो पटक उद्घाटन समारोह कुनै स्टेडियम बाहिर गरिएको हो ।
उद्घाटनका अवसरमा ओलम्पिक मशालका लागि रहस्यमय मानिसहरु पनि आकर्षणको केन्द्र बनेका थिए ।
लिजेन्ड फुटबलर जिनेदिन जिदान, टेनिस लिजेन्ड रफाइल नदाल, धावक कार्ल लुइस, फ्रान्सका सबैभन्दा पाका जीवित ओलम्पिक च्याम्पियन १०० वर्षका साइकल चालक चाल्र्स कोस्टेसँग उक्त मशाल पुगेको थियो ।
त्यसपछि सेलिन डियोनको सुरिलो आवाजसँगै हट बेलुनले उडान भरेको थियो । साथै फ्रान्सले आफ्नो सांस्कृतिक विविधता, क्रान्तिको इतिहास, वास्तुकलाको शानदार विरासत दुनियाँ सामु पेश गरेको थियो ।
चार घण्टासम्म चलेको उक्त उद्घाटन समारोहमा खेलाडीहरुको शपथपछि फ्रान्सको संस्कृतिको प्रतीक एफिल टावरमा लेजर लाइट शो भएको थियो ।
पेरिस ओलम्पिक साउन ११ देखि भदौ १० गते (जुलाई २६ देखि अगस्त ११ तारिख) सम्म सञ्चालन हुँदैछ । यद्यपि यसका खेलहरु ८ जुलाईदेखि नै शुरु भएका थिए ।
पेरिस ओलम्पिकमा ३२ खेलका ३२९ वटा इभेन्टसमा १० हजार ७०० (यसको यकिन तथ्याङ्क अझै आएको छैन) खेलाडीले प्रतिस्पर्धा गर्दैछन् ।
पेरिस ओलम्पिकमा सुरक्षा व्यवस्थापन अभूतपूर्व हुने मुख्य आयोजक टोनी एस्ताङ्गेले बताएका छन् । उनले प्रतियोगिताका क्रममा ३५ हजारदेखि ४५ हजार सुरक्षाकर्मीले खेल आयोजनास्थल र सेन नदीमा हुने उद्घाटन समारोहका लागि परिचालन हुने जनाएका छन् ।
नेपाली खेलाडीको खेल र तालिका
यसपटक नेपालबाट सात खेलाडीले ओलम्पिकमा भाग लिँदैछन् ।
जसमा ब्याडमिन्टन खेलाडी प्रिन्स दाहालले पुरुष एकलमा साउन १२ देखि १६ गतेसम्म समूह चरणका खेल खेल्नेछन् । उनी समूह जे मा छन् ।
टेबलटेनिस खेलाडी स्यान्टु श्रेष्ठ पुरुष एकलमा खेल्दैछन् । उनी साउन १२ देखि १६ सम्म समूह चरणका खेलमा खेल्नेछन् ।
सुटिङ खेलाडी सुस्मिता नेपाल १० मिटर एयर राइफलमा प्रतिस्पर्धा गर्दैछिन् । छनोट चरण साउन १३ गते हुनेछ ।
पौडी खेलाडी अलेक्जेन्डर शाहले १०० मिटर फ्रिस्टाइलमा खेल्दैछन् । हिट चरण साउन १५ गते रहेको छ ।
पौडी खेलाडी डुवाना लामाले २०० मिटर फ्रिस्टाइलमा खेल्दैछिन् । साउन १३ गते हिट चरण हुँदैछ ।
जुडो खेलाडी मनिता श्रेष्ठ प्रधानले ५७ केजी मुनि तौल समूहमा खेल्दैछिन् । समूह चरण साउन १४ गते रहेको छ ।
र म्याराथन खेलाडी सन्तोषी श्रेष्ठले महिला म्याराथनमा भाग लिँदैछिन् । म्याराथन साउन २७ गते हुँदैछ ।
