काठमाडौं । रुस विश्वकप फुटबलमा ह्यारी केनले ट्युनेसिया विरुद्ध दुई गोल गर्दा अनौठो इतिहास बन्यो । उनले विश्वकपमा गरेको दुई गोल इंगल्याण्डका लागि २८ वर्षपछि पहिलो पटक भएको थियो । 

अर्थात् सन् १९९० मा क्यामरुन विरुद्ध गेरी लिनेकरले दुई गोल गरेका थिए । केनले २८ वर्षपछि गरे । 

इंगल्याण्डले स्वीडेन विरुद्ध सन् २००६ मा दुई गोल गरेको थियो । यसपटक रुस विश्वकपमा ट्युनिसियालाई २–१ ले हराएर विश्वकपको विजयी सुरुआत गर्ने क्रममा कप्तान ह्यारि केनले दुई गोल गरेर जिताए । 

तर गोल सहज थिएन । पहिलो गोल ११ मिनेटमै गरेका थिए । ३५ औं मिनेटमा फेर्जानी सासीले बराबरी गोल गरे । खेल निरस भइरहेको थियो । इन्जुरी समयको १ मिनेटपछि केनले फेरि कप्तानी पारी देखाएर गोल गर्दै टिमको उद्दार गरे । 

इंगल्याण्डले निकै राम्रो खेलेको थियो । तर गोल गर्न सकेन । युवा खेलाडीले भरिएको इंगल्याण्ड यति जोसिलो खेलिरहेको थियो मानौं कि दर्जन गोल त कतै नजाला । 

सुरुआती पाँच मिनेटमा दुई प्रहार यस्ता थिए कि दुवै गोल निश्चित जस्तो थियो । तर सोचेजस्तो खेलेन । इंगल्याण्डका घरेलु समर्थक निराश थिए । डेली मेलले लेखेको छ –फ्रस्टेटेड नेसन वाचिङ फ्रम होम, टिक टिक एण्ड ब्लडी टिक’ । निराश भएर हेरिरहेका दर्शक केवल घडीको टिक टिक मात्र हेरिरहेका थिए । 

ट्युनिसियाका गोलकिपर र डिफेन्स लाइन राम्रो थियो । तर इंगल्याण्डले राम्रो खेलेन कतिपय प्रहारलाई सदूपयोग गर्न नसक्दा इंगल्याण्डले संघर्ष गर्नुपर्यो । 

इंगल्याण्डले ९ प्रहार गोलका लागि गर्दा केवल दुई बलमात्र सफल भयो । ट्युनिसियाले भने एक प्रहार मात्र गरेको थियो । ६० प्रतिशत बल इंगल्याण्डको नियन्त्रणमा भए पनि त्यसको पूरापुर सदूपयोग भएन । 

फाउल खेल्नमा दुवै टिम माहिर देखिए । इंगल्याण्डले ८ र ट्युनिसियाले १४ फाउल खेल्यो । इंगल्याण्डका खेलाडीले जमेरै फाउल खेलेकाले तीन ट्युनिसियाका खेलाडीको उपचार नै गर्नुपर्यो । 

रेफ्री दयावान भएकैले केवल इंगल्याण्डका कायल वार्करले मात्र पहेंलो कार्ड खाए । 

इंगल्याण्डमा प्रिमियर लिग खेलेका एकसे एक खेलाडी छन् । तर तिनीहरुले समर्थकको चित्त दुखाए । तालमेल राम्रो भएन । 

समुह जी को यो खेलपछि समुहमा बेल्जियम र इंगल्याण्डको समान ३–३ अंक छ भने पानामा र ट्युनिसिया अंक विहिन छन् । 

बेल्जियम र इंगल्याण्ड दुवै टिम अर्को चरणमा जाने दावेदार नै हुन् । तर अपेक्षित खेल दुवै टिमले खेल्न सकेनन् ।