काठमाडौं । एसिया कप क्रिकेटको उपाधि श्रीलंकाले जितेको छ । यूएईको दुबईमा आइतबार राति भएको फाइनलमा पाकिस्तानलाई २३ रनले हराउँदै श्रीलंका च्याम्पियन बन्न सफल भएको हो ।
श्रीलंकाले दिएको १ सय ७१ रनको विजयी लक्ष्यसहित मैदानमा उत्रिएको पाकिस्तानले २० ओभरमा अलआउट हुँदै १ सय ४७ रन मात्र बनाउन सक्यो । ओपनर मोहम्मद रिजवानले ५५ रन बनाए पनि टिमलाई जिताउन सकेनन् ।
यस्तै इफ्तिखर अहमेदले ३२ तथा हरिस राउफले १३ रन बनाए बाहेक । अन्य खेलाडीले दोहोरो अंकको रन जोड्न सकेनन् ।
श्रीलंकाका प्रमोद मधुसनले ३४ रन खर्चेर ४, वानिन्दु हसरंगा डी सिल्भाले २७ रन खर्चेर ३ तथा चामिका करुनारत्नेले ३३ रन खर्चेर २ विकेट लिए ।
त्यसअघि टस हारेर पहिले ब्याटिङ गरेको श्रीलंकाले २० ओभरमा ६ विकेट गुमाएर १ सय ७० रन बनाएको थियो ।
भानुका राजपाक्षेले अविजित रहँदै ४५ बलमा ७१ रन बनाए । वानिन्दु हसरंगा डी सिल्भाले ३६ तथा धनन्जय डी सिल्भाले २८ रन बनाए ।
पाकिस्तानका हरिस राउफले ३ विकेट लिए ।
आठ वर्षपछि पहिलो पटक एसिया कप जितेको श्रीलंकाले अहिलेसम्म छैटौं पटक एसिया कपको उपाधि जित्न सफल भएको छ ।
यसअघि सन् २०१४ मा बंगलादेशमा भएको एसिया कपमा श्रीलंकाले पाकिस्तानलाई नै हराएर उपाधि जितेको थियो ।
यसपटक ६ टोली सहभागी रहेकामा बंगलादेश र हङकङ पहिलो चरणबाटै बाहिरिएका थिए । सुपर फोरबाट भारत र अफगानिस्तान बाहिरिँदा पाकिस्तान र श्रीलंकाले फाइनल खेलेका थिए ।
