पोखरा । नेपाली कांग्रेसका युवा नेता एवं कास्की क्षेत्र नं.३ (ख) का उम्मेद्वार प्रकाश बरालले पाराग्लाइडिङ पोखराको पहिचान भएकोले विस्थापित गर्न नहुने बताएका छन् । पोखरा आउने हरेक पर्यटकको रोजाई र गन्तव्य भएकाले पाराग्लाइडिङ विस्थापित गर्न नहुने उनले स्पष्ट पारे ।

‘पाराग्लाइडिङ व्यवसायले सयौं युवाहरुले रोजगारी पाएका छन् । पोखराको अधिकांश पर्यटन यसैले धानेको छ,’ उनले भने, ‘यसलाई विस्थापन गर्ने कुरा सुहाउँदो होइन । अन्तर्राष्ट्रिय उडान नहुने समय छुट्याएर पाराग्लाइडिङ निरन्तर चल्नुपर्छ ।’ 

एक भेटघाटमा उनले पाराग्लाइडिङ विस्थापनको विरुद्ध आवाज उठाउने र सम्बन्धित ठाउँमा पैरवी गर्ने प्रतिबद्धता पनि जनाए । ‘सन् १९९६ देखि यहाँ पाराग्लाइडिङ उडान शुरु भएको हो । सन् २००० देखि भने व्यावसायिक रुपमा पाराग्लाइडिङ कम्पनी सञ्चालनमा आएका छन् । अहिले पोखरामा ६० पाराग्लाइडिङ कम्पनी छन् । यसमा करिब डेढ अर्ब रुपैयाँको लगानी छ’, उनले भने, ‘यस विषयमा सबै गम्भीर भएर सोच्न आवश्यक छ ।’

पाराग्लाइडिङ व्यवसाय अन्तर्राष्ट्रिय विमानस्थल सञ्चालनसँगै विस्थापित हुने डरले व्यवसायीहरु चिन्तित बनेका छन् । यो व्यवसायमा करिब ३७५ पाइलट आवद्ध छन् भने करिब दुई हजारले रोजगारी पाएका छन् । पोखरामा तीन वटा पाराग्लाइडिङ फ्लाइङ स्कूल, चार वटा अल्ट्रालाइट कम्पनी र एउटा हटएयर बेलुन कम्पनी सञ्चालनमा छन् । 

‘पछिल्लो समय साहसिक हवाई खेलकुदले पोखराको पहिचान थपेको छ । पाराग्लाइडिङ व्यवसाय बन्द वा स्थानान्तरण हुँदा व्यवसायीलाई मात्रै होइन, समग्र पोखराको पर्यटन क्षेत्र नै तहस नहस हुन सक्छ’, उम्मेद्वार बरालले भने ।  

आउँदो जनवरी १ देखि अन्तराष्ट्रिय उडान गर्ने नागरिक उड्ययन प्राधिकरणको तयारी छ । त्यसअघि नै पाराग्लाइडिङ कम्पनीलाई विकल्प खोज्न निर्देशन दिइएको छ । तर व्यवसायीले पोखराबाट पाराग्लाइडिङ विस्थापन गर्न नहुने अडान राख्दै आएका छन् । उनीहरुले पोखराकै आकाशमा समय मिलाएर उडाउन पाउनुपर्ने माग राखेका छन् । उम्मेद्वार बरालले व्यवसायीको माग जायज भएकोले स्थानान्तरण गर्न नहुने बताएका हुन् । 

‘पाराग्लाइडिङ पोखराको फस्टाउँदो ब्राण्ड हो । यहाँ आएका जोसकुै पर्यटक एक पटक पाराग्लाइडिङमा उडेर हावासँग कावा खान चाहन्छ,’ बरालले भने, ‘अन्यत्र सार्दा यसको महत्व घट्न सक्छ । फेवातालमाथि उड्नु र अन्यत्र उड्नुमा त धेरै फरक पर्छ ।’

यही निर्णयले पोखराको पर्यटन क्षेत्र नै ध्वस्त हुन सक्ने भन्दै जिम्मेवार भएर निर्णयमा पुग्न प्राधिकरणलाई उनको आग्रह छ । बरालले पोखराको पर्यटन विकासमा आफ्नो प्रमुख जोड रहेको बताए । उनले फेवातालको नियमित सरसफाई र यसको लाभ समान वितरणमा आफ्नो चासो रहेको सुनाए ।

‘फेवाको घेरोमा फुट ट्रयाक बनाएर पर्यटकलाई घुमाउनुपर्छ । तालको सीमा रहेका सबै क्षेत्रले पर्यटकबाट प्राप्त हुने लाभको उपभोग गर्न पाउनुपर्छ,’ उनले भने, ‘ताल जोगाउने पनि हामी नै हो, यसको लाभ पाउने पनि हामीले नै हो ।’ उनले ताल पुर्ने शिरका खोलाहरुमा चेक ड्याम निर्माण गर्ने र माथिल्लो तटीय क्षेत्रमा वृक्षरोपण गर्ने योजना घोषणापत्रमा उल्लेख गरेका छन् । 

यस्तै, पर्यटन क्षेत्र कोरोना र भूकम्प लगायत महामारीका कारण शिथिल बनेको भन्दै यसलाई उकास्न सरकारले विशेष राहत प्याकेज ल्याउनुपर्ने बरालको माग छ । निर्वाचित भएपछि संसदमा नियमित रुपमा पर्यटन व्यवसायको हक र हितमा पैरवी गर्ने उनको भनाइ छ ।